等一隻貓咖啡

相信有唔少讀者,都會見過一啲好無助嘅流浪貓,但喺冇相關專業知識情況底下,有唔少人都會選擇無視,好心啲嘅會打俾「愛協」。一位年輕嘅老闆娘認為咁仲未夠,為咗流浪貓更加親身創業,設立「等一隻貓咖啡」,扣除成本開支後,會將部份收益捐贈俾幾個幫助流浪貓義工團體。同時店內亦都有一塊領養板同義賣區,客人等餐點嘅期間,變相可以做善事同時推動領養,令保育貓貓嘅意識更高。老闆娘由籌備Cafe嘅時候,就已經開始捐助俾某啲義工機構,顧客亦都可以每個月頭喺Facebook或者Instagram呢啲社交平台上面,見到店家上傳嘅入數紙。不單止可以令顧客清楚捐款去向,亦可以令更多人了解呢間Cafe嘅理念,難怪創業只有幾個月,但Cafe口號:「你的每次來臨,流浪貓便會有一餐溫飽」經已街知巷聞。本身已經係「貓奴」嘅老闆娘屋企已經有5隻貓,現時鋪頭更加有8隻貓,不過大部分都係流浪貓,唔少都係一家人嚟,有兩兄弟,亦都有兄妹。咁當中最難得又係咩呢?老闆娘就話:「最難得係有一家三口齊齊整整,我哋都唔想拆散一家人。」咁有愛心又成功嘅老闆娘,喺邊度搵呀?

老闆娘唔單止有愛心,就連對咖啡製作都相當認真,坊間有唔少樓上cafe,都係用咖啡粉同奶精沖製而成,不過「等一隻貓咖啡」用嘅,全部都係即磨咖啡,就好似「玫瑰鮮奶咖啡」咁,係用鮮鮮牛奶沖泡而成。另外有部分同行,為求減省成本,會用茶包代替「花茶」,不過店內全部花茶都係精心調教,每一款都有唔同功效,「玫瑰桃花紅棗茶」不單止入口清甜,仲有改善氣色同皮膚嘅功效,「三花茶」就加入桂花,花味更香濃同時,亦都有肌同舒緩情緒嘅功效,啱曬壓力大嘅香港人。不過講到最受歡迎嘅飲品都係「Oreo 脆脆朱古力」,味道夠濃,一班後生仔當然相當鐘意呢杯飲品啦!有咖啡又點可以冇蛋糕呢?店家嘅千層蛋糕全部由日本直送,不單止大件夾抵食,亦唔會太甜。套餐值都只係加二十幾蚊同四十幾蚊,唔話抵食都唔得呀!有理念又有實力嘅cafe,當然值得得到支持啦!

 

Oreo 脆脆朱古力 
玫瑰荔枝梳打
玫瑰桃花紅棗茶
抹茶千層蛋糕

等一隻貓咖啡
地址:旺角彌敦道642-644號陶德大廈3樓642室
聯絡電話:94511543
營業時間:13:30 – 22:30(星期一至星期五)﹑12:30-23:00(星期六﹑日)
Instagram:@waitingcatcafe
Facebook:waitingcatcafe

發表迴響