滬小園

自己本身喜歡食上海菜,緊係周圍去試吓啦,聽朋友講元朗開咗間新派上海菜,個名叫做「滬小園」,於是我哋就入元朗一探究竟,見到紅紅招牌,好搶眼,推門進去感覺雖然不大,但十分乾淨企理,坐底就即刻翻看餐牌,睇下有咩好介紹,最後我地叫左風味麻辣手撕鷄、滬小園醉雞、上海鎮江牛肉、麻醬雞絲粉皮、四川口水雞、變態白切肉、沙拉蝦球、脆皮大王豬扒擔擔麵、上海砂鍋雲吞鷄(半隻),最後點左樣上海菜必食嘅酸辣湯。

先黎酸辣湯,聞到已經好香,食落夠酸又夠辣,非常適合未食野前先黎一碗,開開個胃,食完個人暖笠笠;風味麻辣手撕鷄,我地叫係中辣度,食落辣度適中,有少少麻,手撕雞入面加左芋頭絲,所以食落去有種脆口,而雞肉都十分爽口;滬小園醉雞,食得出酒味,有時好怕醉過龍,令雞肉變苦,但這個醉得入味恰到好處,與別不同;上海鎮江牛肉傳統的手工菜,賣相精緻,味道也唔錯;麻醬雞絲粉皮賣相顏色比較深色,好重麻醬香味,而粉皮相當滑溜;四川口水雞辣度可以接受,雞肉都算嫩滑;變態白切肉係呢到嘅招牌菜,聽到個名都覺得辣,啱晒喜歡食辣嘅我,而依種辣度會慢慢滲出黎,愈食愈想食,麻辣且香嘅味道,真係令我好難抗拒,水準之作!食完辣野想中和下,試吓呢個沙拉蝦球,望落去大大件,份量好足,食落去好脆口,而個沙律醬酸酸甜甜,而蝦肉比想像中清甜,食得出唔係急凍蝦,又新鮮又抵食;上海砂鍋雲吞鷄(半隻)個雞湯好香又唔會好鹹,雲吞粒粒足料,裡面的豬肉口感算是新鮮,仲有一些蔬菜同雲耳絲,也符合我的期望;另外脆皮大王豬扒擔擔麵,豬扒同麵係分開上,豬扒炸得金黃,店員已經將豬扒剪開成一件件,食起上嚟好方便,豬扒薄身多汁,皮脆香口,而個麵底幼滑本身都吸引了湯底的味道,好入味,湯底做得也相當出色,帶有少少蝦米同蒜蓉香味十分濃郁。真係喜出望外的一餐,打破了人們對一般上海菜又油又鹹的觀感,「滬小園」加入了自己的特色,令食物更加有層次感,新派的上海菜。食物水準比我預期高,比一般餐廳水準高,價錢都係差唔多,性價比高,值得回頭!敢好食嘅菜式大家記得黎試下喇!

滬小園醉雞
麻辣手撕鷄
沙拉蝦球
上海砂鍋雲吞鷄(半隻)

滬小園
地址:元朗裕榮徑11號好旺洋樓地下10號舖
電話:34604393

 

發表迴響