【中秋專題】七間精選中秋禮盒小店 自用送禮唔失禮

仲有唔夠半個月就到中秋喇,大家買哂應節食品未呢?月餅點都唔嫌多,買多幾款換下花臣都唔錯㗎~嫌悶可以揀送曲奇,有心意仲夠特別;至於送畀長輩嘅話,加埋個果籃就夠大方得體喇!

1. Delight Kitchen

Delight Kitchen嘅傳統月餅都會採用低糖配方,包保健康又老少咸宜,另外必試酥皮奶皇月餅,靈感緣自潮洲月餅,外型圓碌碌,口感鬆化,一個人食哂一粒都唔怕滯。

2. BFF Garden

BFF Garden嘅「 花·語」山茶唧花月餅花瓣層層疊上,靚到不得了,送畀咩年齡嘅女性都fit哂!想更有心意,直情可以報堂自己整,仲冧呀~

3. Kiki's Cakes

唔想又送月餅咁悶,Kiki’s Cakes嘅動物曲奇就係最佳選擇,每款都好得意,細節位仲要好精緻,最美中不足之處,就係唔捨得食佢地落肚。

4. Mic's Bakery

Mic’s Bakery嘅3D卡通冰皮超可愛,立體花冰皮就夠花俏,仲可以自己落手落腳做,有得食又有得玩!追求味道嘅,可以試下評茶師親自配搭嘅系列,究竟唔同濃淡茶葉,襯咩餡料先最perfect呢?

5. 品味生活烘焙Enjoy

售賣烘焙材料嘅品味生活,做月餅都好出色,必試用上黃金比例嘅手工奶黃,鹹香又綿滑;奶皇系列同時亦有朱古力、抹茶及鳳梨口味,每款額外設有無蛋無奶嘅純素外皮,非常貼心!

6. Psalm Living

Psalm Living的唧花一向出色,乘住中秋節,佢地更將唧花融合冰皮,配上自家製嘅奶皇或芝麻餡,呢個牡丹冰皮月餅系列的確睇得又食得。

7. 千悅水果屋

中秋節去拜訪親戚,除咗月餅禮盒,加埋個靚靚果籃就更加得體!千悅水果屋係全球搜羅水果,保證高質,果籃禮盒價錢三百零蚊至二千幾蚊不等,豐儉由人。

發表迴響