【召集餃控之荃灣餃子地圖】荃灣名物餃子屋｜拳頭大餃子｜三鮮韭菜盒子｜惹味菜脯｜鮮肉茴香餃｜鮮肉酸菜餃｜餃子雙併｜蒸煎湯餃合集

繼上集土瓜灣餃子地圖，今集終於嚟到荃灣啦！荃灣除咗天橋多，原來餃子店都好多～講到荃灣餃子，點會少得大名鼎鼎嘅餃子屋呢！
餃子屋啲餃子出名大粒，一粒頂人哋兩粒，而且超多款式，好似咖喱薯仔豬肉餃、紫菜豬肉餃都係比較少見。
小帝餃子館老闆係東北人，特登把餡料調較到啱返港人口味，菜多肉少，想客人食得更健康。湯底每日煲足3個半鐘，因為有隔油，表面好清，絕無味精！極推佢哋嘅三鮮韭菜盒子，新鮮熱辣夠香脆，咬出嚟仲要大爆汁，好食！

荃灣亨通餃子店係一對哈爾濱夫婦開，開鋪九年，最初喺油麻地經營咗5年，後尾嚟到荃灣。餃子材料喺北方空運過嚟，保證食到北方餃嘅原汁原味。鮮肉茴香餃夠罕見，茴香味道係好特別，同其他蔬菜唔同，食療功效多，仲可以抗癌，嚟到一定要試！鮮肉酸菜餃入面嘅酸菜因為有清洗過，所以味道唔重，更易接受。
最後呢間峰味清雞湯米線，主打清雞湯手工包餃子，只做外賣。價錢貼地，$22有6隻，味道似韭菜餃，蔬菜多，正常發揮。

餃子屋
荃灣西樓角路202-216荃昌商場1樓58號鋪風味三併(粟米，香菇木耳雞肉、三色椒) $58/各3隻

小帝餃子館
地址：荃灣青山公路340號荃錦中心地下C號鋪
雲耳白菜豬肉餃$36/7隻香荽牛肉餃$40/7隻三鮮韭菜盒子$40/7隻

荃灣亨通餃子店
地址：荃灣沙咀道167號滿樂大廈地下
鮮肉茴香餃$49/10隻鮮肉酸菜餃$48/10隻牛肉餡餅$19

峰味清雞湯米線
地址：荃灣鱟地坊80-84號華成樓B座地下B6號鋪
清雞湯水晶餃$22/6隻

延伸閱讀：
【召集餃控之土瓜灣餃子地圖】
https://www.youtube.com/watch?v=4YZ4fDMKJPo