【18區搵食-新蒲崗搵食2.0】今集太亢奮語速快咗少少請見諒｜最愛新蒲崗｜乾炒粒粒通粉料多鑊氣重｜手打牛筋丸有口感｜慢煮手撕豬腩窩夫｜鹹窩夫絕唔輸甜窩夫｜唔食Y小編會嬲系列｜老闆有態雞蛋仔

今集再次嚟到Y小編最愛嘅新蒲崗，記得上集喺新蒲崗搵食，食得好開心，今次都唔例外！打開片頭應該都feel到我有幾開心同亢奮啦～搞到語速快咗少少，好似較咗1.5倍咁，請大家多多體諒。

第一間肥仔銘，必食有兩款，熱香餅同乾炒粒粒通粉，超多人推薦！熱香餅單食冇乜特別，當你夾埋雞蛋同漢堡扒一齊食，你會覺得去咗日本食緊個麥當勞早餐咁～至於乾炒粒粒通粉有鑊氣之餘，入面配料好多，芽菜、韭菜、香腸、紅腸、午餐肉同青椒等，每一啖都好豐富，加錢用XO醬炒，超級惹味！

成記牛什粉麵，出名牛腩牛雜同手打牛丸！牛丸粒粒形狀唔同，入面加咗牛筋，令到口感更爽彈！牛腩米同樣出色，記得要落佢哋嘅辣椒油，牛腩軟腍重牛味，加上辣椒油嘅香氣，牛腩米都可以好有風味～

窩子出名程度唔使講，晏少少去免不了要排隊。強烈推薦慢煮手撕豬腩窩夫三文治！！份量大，賣相好，味道一流！真係搵唔到缺點，佢嘅手撕豬腩肉仲食到一絲絲嘅口感，唔食Y小編會嬲系列！

最後一間629雞蛋仔，除咗雞蛋仔多人讚，老闆嘅態度都引起大家討論。門口有張紙仔貼住，無論你係邊個，過嚟食雞蛋仔就一定要排隊！買到嘅雞蛋仔同格仔餅，講到明一定要擘大個口即刻食，老闆咁有態度，抵佢多人讚！雙併雞蛋仔真材實料，食到粒粒芋頭同紫薯，正呀！

肥仔銘茶餐廳
地址：新蒲崗錦榮街9號地鋪
熱香餅餐 $38 (凍飲+$2)
乾炒粒粒通粉 $52 (XO 醬+$8)

成記牛什粉麵
地址：新蒲崗錦榮街4A號地下
牛腩米 $33
淨牛丸 $33

窩子
地址：新蒲崗仁愛街36號地下
慢煮手撕豬腩窩夫三文治 $99 (lunch set+$25)

629雞蛋仔
地址：新蒲崗康強街28號康景商場地下28J舖
香芋紫薯雙併雞蛋仔 $30