【荃灣家姐黃溢濠帶路之路德圍掃街＋尋找全港最後一個麥當勞叔叔】

【荃灣家姐黃溢濠帶路之路德圍掃街＋尋找全港最後一個麥當勞叔叔】一早食重口味米線？｜全場滿座唯一米線，大癲！｜TF18禁？｜我揸緊波你整緊飛機｜對話出唔到街｜挑戰路德圍$50掃街｜燒賣關注組力讚冠華燒賣｜尋找石圍角的美｜超平士多尋寶記｜同全港最後一個麥當勞叔叔打卡｜荃灣人要睇

繼上上集有屯門爺爺帶我搵食，今集有佢個fd——荃灣家姐黃溢濠，帶路食好西，除咗有荃灣人氣米線店、路德圍掃街，仲去埋石圍角邨，尋找全港最後一個麥當勞叔叔@@呢集可以話係家姐系列以來，內容最豐富嘅一集，唔睇會後悔系列!!

0:00 家姐出場
1:29 荃灣唯一米線
6:02 路德圍掃街$50挑戰
15:02 石圍角屋邨情懷
21:44 最後1個麥當勞叔叔

第一站係荃灣家姐嘅愛店，佢話久唔久就要嚟食嘅唯一雲貴川風味米線。鋪頭由0700開始營業，未到11點嚟到，全場滿座，真係大癲！我都係第一次食重口味米線做早餐@@黃溢濠點名推薦佢哋嘅腩肉，腩肉帶少少辣，叫清湯底再連埋腩肉一齊食唔會太辣，味道剛剛好～加咗酸辣嘅米線更惹味，豬腸處理得好好，軟腍入味，鍾意食酸又鍾意重口味嘅朋友，千祈唔好錯過～

Y小編作為非荃灣人，一講起荃灣，第一時間諗起路德圍，所以特登安排路德圍掃街$50挑戰環節。諗住$50買唔到好多嘢食，點知買買吓都可以滿載而歸，有甜品、麵包、燒賣、蛋撻等等等等……Y小編同黃溢濠出盡奇招，到底鹿死誰手？

黃溢濠作為街坊，帶路去佢細個成日「打躉」嘅地方石圍角邨，等小巴期間，仲撞到佢小學同學嘅媽媽@@相當有緣～嚟到石圍角邨，先去超平士多買零食，仲有好多小時候嘅糖果，回憶滿滿呀。隔離仲有好多彈波波機，用$7成功中獎3次，好耐冇試過玩得咁開心咁盡興，真係有種返返去小朋友時候嘅感覺。途經冠華粥麵，呢度嘅燒賣受到燒賣關注組力讚，大大粒仲好香，識食嘅一定要叫埋牛腩麵！佢嚿牛腩真係冇得輸！

最後嚟到石圍角邨嘅M記，因為呢度有翻新工程，好多店鋪都關門大吉，據聞呢間麥當勞，係全港最後一間有大大個麥當勞叔叔嘅分店，大家記住要爭取時間去打卡影相～喺訪問嘅過程，到底點解Y小編會講：「我揸緊波你整緊飛機」呢句18禁嘅說話？

同上集一樣，唔准諗即刻答：講3樣最代表到荃灣嘅嘢！
*特別鳴謝荃灣家姐——黃溢濠wongyatho

唯一雲貴川風味
地址：荃灣四陂坊14號地下
自選酸辣米線 $65 （腩肉、雞肉、豬腸）
自選米線 $58 （腩肉、雞肉、韭菜）

冠華粥麵
地址：荃灣石圍角邨石芳樓地下7號鋪
燒賣 $15/8粒
牛腩麵 $34

撰文、主持：Yvonne Lam
攝影：Doris Wong、Peter Li
剪接：Doris Wong
美術：Anita Lam

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=