【18區搵食-大角咀3.0之食極唔完點解咁多好嘢食！】

【18區搵食-大角咀3.0之食極唔完點解咁多好嘢食！】其實仲有好多小店未介紹｜cafe系茶記｜嚟到一定要叫咖喱汁＋薄餅？｜炒紅飯超重番茄味｜新沙洞大排檔完美還原韓國街頭｜仲有冰糖豉油王雞髀｜黑色雞髀食過未？｜必食酥皮鯛魚燒｜拉絲麻糬超吸引

今集返嚟大角咀搵食，估唔到大角咀做做吓都做到3.0系列@@仲要間間都好味有質素，每次嚟完大角咀，都飽到捧住個肚走呀！

第一間越旺美食，由大角咀1.0開始，同事已經力推呢一間，今次終於試到佢喇～坐底即刻叫返個咖喱汁＋印度薄餅，咖喱汁有2款，分別係越式咖喱同印度咖喱，前者椰汁味重；後者洋葱味濃，我揀咗越式咖喱，不過唔知係咪唔太啱自己口味，食落覺得洋葱味好突出@@反而豬頸肉炒紅飯最有驚喜！紅飯即係番茄飯，用茄膏代替茄汁炒飯，番茄味夠出又濃厚，冇茄汁嘅甜味，係酸嘅番茄飯啊，真係愈食愈開胃，豬頸肉爽彈份量多，以茶記嚟講幾高質！

第二間新沙洞大排檔，單係見到門口，好似置身韓國街頭咁，裝修環境超有feel！行入去鋪頭，大大聲播住韓文歌，一邊食一邊聽都咪話唔正xd午市定食加錢，點咗韓式辣豬肉炒粉絲，味道帶甜，同韓國食到嘅一模一樣；至於甜辣炸年糕，除咗份量少啲，都冇咩缺點。但如果就住佢嘅環境，絕對值得過嚟食嘢打卡！

第三間新耀記食店，位置係正台式人氣餐廳那個ㄋㄚˋ ㄍㄜ˙隔離，呢度嘅招牌名物，就係冰糖豉油王雞髀，一上枱，成隻雞髀黑媽媽，賣相唔算討好，但入口真係有冰糖嘅甜味，同平時食嘅滷水雞髀相比，冇咗浸死甜味，外皮入口有啲焦糖微苦嘅感覺，食晒成隻都冇問題！跟雞髀上嘅燒汁撈麵，加咗辣非常惹味，配埋雞髀一齊食超滿足～

最後一間幸谷駅さちやえき，主打魚仔形狀鯛魚燒，有普通原味鯛魚燒，同酥皮鯛魚燒兩款，普通鯛魚燒食落就似平時食嘅雞蛋仔咁，入面係用富良野3.7牛乳自家製吉士，蛋香味幾出，不過就冇酥皮鯛魚燒咁出色！強烈建議一定要食黑糖鮮奶麻糬口味，酥皮夠脆之餘，入面仲有軟乎乎嘅拉絲麻糬，真係好好食㗎！！！

你哋平時去大角咀會食邊幾間餐廳？歡迎留言話俾我聽！

越旺美食
地址：大角咀中匯街37-39號地鋪
咖喱汁 $18
印度薄餅 $15
豬頸肉炒紅飯 $64

新沙洞大排檔
地址：大角咀大政街10號地鋪
午市定食 $58
韓式辣豬肉炒粉絲 +$20
甜辣炸年糕 +$12

新耀記食店
地址：大角咀埃華街116-118號地下7C號鋪
冰糖豉油王雞髀+燒汁撈麵 $60

幸谷駅さちやえき
地址：大角咀角祥街20號地下D3號鋪
自家製富良野3.7牛乳吉士鯛魚燒 $22
黑糖鮮奶麻糬酥皮鯛魚燒 $32

主持、撰文：Yvonne Lam
攝影、剪接：Doris Wong
美術：Anita Lam

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=