【18區搵食-食爆觀塘老母2.0】人氣星馬飯店｜每食一啖都辣親嘅胡椒湯麵｜好飲腐竹薏米冰｜豪隍點心｜2倍大燒賣蝦餃｜神好吃墨西哥叉燒包｜TF飯堂｜秘製大雞髀｜人氣cafe長期人龍｜意大利芝士熔岩

【18區搵食-食爆觀塘老母2.0】人氣星馬飯店｜每食一啖都辣親嘅胡椒湯麵｜好飲腐竹薏米冰｜豪隍點心｜2倍大燒賣蝦餃｜神好吃墨西哥叉燒包｜TF飯堂｜秘製大雞髀｜人氣cafe長期人龍｜意大利芝士熔岩｜流心效果

今集觀塘老母2.0嚟到自己嘅Comfort Zone，果然係自己地頭搵食係開心啲嘅！係人都知觀塘出名多嘢食，但要搵到真．好味嘅，都唔係咁簡單～

第一間拿督星馬大飯店，記得初期喺觀塘區返工，聽同事講過無數次，冇食過拿督唔算得上係觀塘打工仔！位置雖然遠啲，不過lunch time依然人頭湧湧，今次試camman力推嘅胡椒湯麵，湯底胡椒味重到每食一啖都會被辣親！第一次食雞雜，比想像中容易接受，同胡椒湯底又幾夾喎！怕太辣一定要叫返杯新加坡腐竹薏米冰，好似食緊腐竹糖水一樣，解辣又好飲^^

第二間豪隍點心工房，去咗啱啱新開無耐嘅鴻圖道分店，地鋪更加方便一班老友記！除咗必點2倍大嘅燒賣蝦餃，佢哋嘅墨西哥叉燒包真係好味到揼心口！可以連食6個！尤其係上面層墨西哥皮，香酥帶甜，同我叫半打呀唔該～

第三間龍鳳號可以話係TF編輯嘅飯堂之一，每次諗唔到食咩呢間都榜上有名。食完都會大滿足，即刻有力氣！嚟到必點炸秘製大雞髀，雞髀大，炸粉薄，午餐仲會有埋前菜同湯品，可以自選米飯/板條/米粉，配埋台式飲品，一次過滿足晒3個願望～

最後一間Cobber Coffee，未去之前已經聽聞超多人排隊，諗住平日下午時段會冇乜人？咁諗就大錯特錯！今次為咗佢嗰意大利芝士熔岩而嚟@@一上枱最好3分鐘內拎開個膠紙，雖然今次啲cream冇流得好澎湃，但睇住啲cream慢慢流落嚟，過程都幾治癒㗎～一擺入口仲要入口即溶，好後悔嗰時Tiramisu系列冇擺佢入去呀:(

拿督星馬大飯店
觀塘海濱道190號觀塘碼頭熟食市場1樓20號鋪
怡保雞雜胡椒摻摻（油麵+米粉）$51
檳城五香肉卷 $24/2件
新加坡腐竹薏米冰特飲+$10

豪隍點心工房
地址：觀塘鴻圖道83號東瀛遊廣場地下B號鋪
墨西哥叉燒包 $26
鮮蝦腐皮卷 $30
豪隍蝦餃皇 $26
蝦仁燒賣皇 $26

龍鳳號
地址：觀塘駿業街56號中海日升中心2樓2B號鋪
炸秘製大雞髀配古早味肉燥飯 $68
檸檬冬瓜茶飲品+$12

Cobber Coffee and Tonys Pastry
地址：觀塘駿業里8號世貿大樓1樓
意大利芝士熔岩 $98

更多文章