【18區搵食-去荃灣唔食米線食車仔麵？！】去香車街市唔食老闆娘雲南米線｜肥媽屋撈麵｜唔使排隊嘅嘉樂冰廳｜蛋牛治真係成本字典咁厚？｜謙虛的小奄列｜台灣過江龍蛋餅王｜黯然銷魂叉燒蛋餅｜是日最佳鮮芋泥豆乳

【18區搵食-去荃灣唔食米線食車仔麵？！】去香車街市唔食老闆娘雲南米線｜肥媽屋撈麵｜唔使排隊嘅嘉樂冰廳｜蛋牛治真係成本字典咁厚？｜謙虛的小奄列｜台灣過江龍蛋餅王｜黯然銷魂叉燒蛋餅｜是日最佳鮮芋泥豆乳｜開心收工後發生意外？

今集終於嚟到荃灣搵食！係呢個咁多美食嘅地方，要精選4間出嚟真係有啲難度，所以今次食嘅都係比較出名嘅舖頭～留返2.0先再試啲小店啦^^

第一間嚟到肥媽屋，平時大家過嚟香車街市，可能都係排隊食老闆娘雲南米線，其實除咗嚟食米線，呢間肥媽屋都好值得一試！主打車仔麵，睇啱咩餸直接叫，有啲似放題咁，之後再揀麵底。今次試咗好多人都推薦嘅撈麵！撈麵醬汁真係好濃郁！揀咗最招牌嘅3款餸，豬腸、鳳爪同釀豆卜，豬腸帶點肥膏，味道更香；鳳爪入口脫骨，好食！仲有老闆娘推薦嘅釀豆卜，將全部嘢撈埋一齊確實幾有風味～

第二間嘉樂冰廳，真係久仰大名，以食物份量多而出名！好好彩居然唔使排隊，當然要食蛋牛治同小奄列。平時喺IG見到啲相影得好誇張，但當見到實物嘅時候，同想像中有少少出入@@不過味道質素係ok嘅～淋咗美極豉油嘅奄列，完美還原小時候嘅味道，不得不說，蛋嘅分量好足，飽肚嘅！如果大家鍾意飲好立克，一定要試埋好立克奶昔，會令你眼前一亮，讚！

第三間蛋餅王，同海灣冰室聯乘，將正宗嘅台灣蛋餅帶嚟香港！叫咗香港限定嘅黯然銷魂叉燒蛋餅，除咗叉燒，入邊仲有芝士，加埋面頭嘅醬油膏，完全係台灣食到嘅蛋餅味呀！估唔到叉燒加芝士，再連埋蛋餅一齊食係零違和感，雖然價錢絕對唔平，但如果真係好掛住台灣嘅蛋餅，嚟開荃灣可以試吓～

最後一間豆乳狂人，自己私心想試好耐！見到每位客人枱上面都有鮮支芋泥豆乳，我都唔執輸，即刻買嚟試吓！第一啖飲到好香濃嘅豆味，之後芋泥味道慢慢湧出，超！好！飲！除咗飲品仲有甜品選擇，今次叫咗煙韌之選，入邊有芋圓、小丸子、珍珠同豆乳布甸等等，咁多款唔同嘅材料真係超滿足！可惜cut完機之後就發生意外，唔講咁多快啲睇片啦！

肥媽屋
地址：荃灣香車街街市1樓熟食檔
車仔撈麵 $40

嘉樂冰廳 (新村街)
地址：荃灣新村街40B號地鋪
鹹牛肉蛋三文治 $30 (烘底+$2)
火腿小奄列 $33
好立克奶昔 $30

蛋餅王聯乘店·香港
地址：荃灣大河道100號海之戀商場地下G01號鋪
黯然銷魂叉燒蛋餅 $58

SOYmart by 豆乳狂人
地址：荃灣大河道100號海之戀商場2樓2036號鋪
鮮芋泥豆乳 $32
煙靭之選 $45

主持、撰文：Yvonne Lam
攝影、剪接：Doris Wong
美術：Anita Lam

更多文章