【真實試！邊間螺螄粉好味道？最近討論度極高2間螺螄粉】未開門已經有人排隊｜招牌柳州螺螄湯粉｜第一啖居然係極重「？」味｜乾撈仲好食？ | 特色幹撈螺螄粉｜必點炸蛋｜炸蛋螺螄粉｜仲有真正螺螄肉

【真實試！邊間螺螄粉好味道？最近討論度極高2間螺螄粉】未開門已經有人排隊｜招牌柳州螺螄湯粉｜第一啖居然係極重「？」味｜乾撈仲好食？ | 特色幹撈螺螄粉｜必點炸蛋｜炸蛋螺螄粉｜仲有真正螺螄肉｜同場加映福鼎肉片｜冇對比冇傷害

唔知大家有冇食過螺螄粉呢？唔係扭扭螺絲粉，而係一拆開包裝，就傳出極濃烈味道嘅嗰隻螺螄粉！小編第一次食嘅時候，臭到要打開晒抽氣扇同窗，以為自己跌咗落坑渠，但當你食完一啖，從此不能自拔，陷入咗螺螄粉嘅瘋狂世界，隔一排冇食就會囉囉攣。

平時要食螺螄粉都是上網買，不過近日，兩間螺絲螄粉專買店開張，小編於12/7日實測，一次過食勻兩間，到底好唔好食？邊間好食啲？

第一站：螺螄町
作為香港首間螺螄粉專門店，開咗個多月，瞬間爆紅，除了招牌柳州螺螄湯粉，有說乾撈版的特色幹撈螺螄粉也非常不錯，一於食齊2款。
小編在1145到達店面，12點準時開門，即使提早15分鐘到，早就有人喺門口排隊，十分厲害。
店面比較細，如果係兩個人去食需要同其他客人搭枱，地方較為淺窄。
Menu選擇多，價錢由$48至$98不等。

招牌柳州螺螄湯粉$48
第一啖入口，個湯真係得個鹹字，鹹到五官嗱埋一嚿……
配料齊嘅，有螺肉炸醬、菜脯、腐竹，酸荀、木耳、酸豆角、花生、葱花；唔夠辣，亦有辣油提供。而需額外加錢嘅炸蛋，令人失望，炸蛋入口重油膉味，滿口都是油，同想像中嘅炸蛋有出入。
螺螄粉用廣西柳州本地米粉，比較硬同埋有彈性，不錯！
總結：整體一般，湯頭只有鹹味，食唔到本身螺螄粉味道，不夠臭亦沒有酸味和辣味，要排隊來吃不值得。

特色幹撈螺螄粉$48
賣相嚇親人，成碗嗰樣好hea，似係將配料隨便放埋一齊，絕不美觀，令人食慾大減（或者自己期望過高）。
配料跟湯粉版大致相同，只係中間多了一坨辣醬。
撈勻食，除咗辣，其他味道完全食唔到，仲要係死辣…
總結：呢個撈粉，自己煮或者仲好味，大失所望。

第二站：螺鼎記
位於深水埗西九龍中心food court，開業唔夠一個月，正評比螺螄町多，受到唔少谷友推薦。餐牌選擇較少，只有4款湯粉選擇，分別是：柳州螺螄粉、炸蛋螺螄粉、虎皮鴨掌螺螄粉和豬手柳州螺螄粉。不過只要味道夠好，一樣吸引到客人。除咗有螺螄粉，仲有一款特色家鄉菜：福鼎肉片。

炸蛋螺螄粉$42
湯底除咗有辣味，仲有酸味，味道豐富得多，終於似屋企煮嘅螺螄粉味道。
炸蛋薄身，唔會食到成口油，吸滿湯汁之餘仲有蛋嘅味道，不錯。
配料選擇同樣有菜脯、腐竹，酸荀、木耳、酸豆角、花生，另外特別加多咗通菜，通菜不突兀，吸滿咗湯汁，好食！
配料可額外加$8螺螄肉，細細粒，帶點海水味，喺香港少見，第一次食可能食唔慣。
螺螄粉有點像粗身米線，不夠Q彈。
總結：炸蛋螺螄粉整體味道不錯，加入通菜幾特別，$42性價比高。不過螺螄肉未必食得慣，單點一個炸蛋螺螄粉就夠。

福鼎肉片
用豬肉加入紅薯粉用手搓成，外表和口感有點像港人常吃的生菜魚肉，口感爽彈，配上紫菜蝦米湯，再帶啲黃辣椒嘅香氣，很惹味。
總結：大胃王可以一試

*食評為當日水準作準，全屬真實個人感受。

螺螄町 (旺角)
地址：旺角通菜街1M-1T號華發大廈地下F號鋪
招牌柳州螺螄湯粉 $48 （小辣）
特色幹撈螺螄粉 $48 （小辣）
招牌炸蛋 $8

螺鼎記 (深水埗)
地址：深水埗欽州街37號西九龍中心8樓38號舖
炸蛋螺螄粉 $42 （小辣）
福鼎肉片細 $25 （小辣）
螺螄肉 $8

主持、撰文：Yvonne Lam
攝影、剪接：Doris Wong
美術：Anita Lam

更多文章