【18區搵食-旺角吃什麼？$100有找威靈頓牛柳＋關注組大推旦王酸辣粉】

【18區搵食-旺角吃什麼？$100有找威靈頓牛柳＋關注組大推旦王酸辣粉】高質威靈頓牛柳｜酥皮脆身牛油飄香｜仲可以加配酥皮湯｜打卡呃like玫瑰形狀餃子｜泰和堂涼茶店唔止賣涼茶｜落咗魔法嘅粉絲椰汁撈芒果｜關注組大推旦王酸辣粉｜必試豬腸＋手打魚肉＋豬柳漢堡｜遇唔到叔叔整但姐姐整嘅都唔差

本地遊做咗咁耐，終於嚟到油尖旺區喇！第一站嚟到旺角，眾多食肆入面，今次揀咗4間餐廳，有兩間呢排討論度極高，被關注組大力推薦，快啲睇吓啱唔啱你哋心水啦～

第一間LA Restaurant & Dessert Bar近期非常人氣，因為佢哋有一個$100有找嘅威靈頓牛柳套餐，可選飯/意粉/薯菜，仲可以加$20轉酥皮湯添。價錢雖然平，但質素一啲都唔差！金黃色嘅牛油酥皮烤得香脆，內裏五成熟嘅牛柳，顏色粉嫩，厚切得嚟肉質軟腍，而且牛味濃郁，難怪咁多食客推薦！平日午飯時段大排長龍，抵佢咁紅啊！

第二間餃燃串，將餃子同串燒crossover，最特別係玫瑰園餃子套餐，有3款味道嘅餃子，味道分別係芝士粟米味、綠色嘅墨魚滑餃子，同埋黃色鮮蝦餃子，最特別係有兩朵玫瑰形狀嘅餃子，絕對可以呃like打卡，未食飽，再叫多兩串串燒～茄子大份，重口味人士一定鍾意！重蒜重調味，加咗孜然粉食落更加香。

食完串燒，嚟到泰和堂涼茶店，話就話係涼茶店，其實入面有售多款中式糖水，推薦芋頭西米露（店員話熱嘅更加好味），底下有大量香糯芋頭，配上一粒粒晶瑩剔透嘅西米露，正啊！想食凍甜品？粉絲椰汁撈芒果都唔錯，粉絲用紅薯粉做，入口爽彈，芒果清甜。呢碗糖水好似落咗魔法咁，令人食上癮，食咗一啖完全停唔到。

最後唔少得去埋旦王，呢間外賣小店係關注組老是常出現。網友食旦王酸辣粉食出心得來，例如：一定要叔叔煮先好味，肥腸加手打魚肉係個膽，外賣記得要分湯等等。今次叫咗正宗重慶酸辣粉加豬腸、手打魚肉同豬柳漢堡，怕太辣只係叫咗小辣……酸辣粉真係好煙韌，豬腸爽得嚟夠肥，手打魚肉份量多，豬柳漢堡本身吸滿湯汁好入味，姐姐整嘅酸辣粉都唔錯喎。記得食嗰陣唔好大力啜入口呀！

嚟旺角你哋又會食邊幾間餐廳？歡迎留言話我聽^^
記得今晚9點準時上YouTube睇片喇～

LA Restaurant & Dessert Bar
地址：旺角通菜街25號鋪
威靈頓牛柳（配薯菜）$98
轉酥皮湯 +$20

餃燃串
地址：旺角通菜街107號地鋪
玫瑰園餃子 $58
豚肉荔枝串 $22
茄子 $36

泰和堂涼茶店
地址：旺角通菜街96號地下
芋頭西米露（熱） $29
粉絲椰汁撈芒果 $36

旦王
地址：旺角弼街72號地鋪
正宗重慶酸辣粉 $66（豬腸、手打魚肉、豬柳漢堡）

主持、撰文：Yvonne Lam
攝影、剪接：Doris Wong
美術：Anita Lam

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=