#TalkFood【#18區搵食—將軍澳2.0貼地冰室糖水鋪+中小學掃街回憶】番茄18必食麻辣番茄湯｜超讚招牌瑞士雞髀｜容易錯過嘅糖水店｜嚟自台灣交換生紫薯正妹｜2條人龍嘅荳子冰室｜懷舊味忌廉溝鮮奶

#TalkFood【#18區搵食—將軍澳2.0貼地冰室糖水鋪+中小學掃街回憶】番茄18必食麻辣番茄湯｜超讚招牌瑞士雞髀｜容易錯過嘅糖水店｜嚟自台灣交換生紫薯正妹｜2條人龍嘅荳子冰室｜懷舊味忌廉溝鮮奶｜酒樓先有嘅芒果花奶布甸｜仲有小學回憶openrice都搵唔到嘅小食店｜好好食嘅炸曲薯條

記得今晚9點準時上YouTube睇片喇～

事隔一年幾，再次嚟到將軍澳搵食！上次帶大家去咗海傍附近嘅4間cafe打卡，今次就介紹幾間貼地少少嘅餐廳，主食、小食、甜品，下午茶乜都有齊晒，快啲去片睇吓有咩好食啦～

第一間番茄18係我嘅愛店，食過一次，深深地愛上佢嘅麻辣番茄湯米線。平時食開嘅番茄湯，大部分只得原味，但呢度居然有麻辣版，佢嘅麻辣唔係辣到噴火嗰種，而係恰到好處，唔會搶晒番茄嘅酸甜，真材實料，有好多番茄碎，清清甜甜好濃郁連埋牛乳炒蛋一齊食，就已經好好味！不過一場嚟到，強烈推薦大家要食埋佢哋嘅瑞士雞髀！單睇個雞皮都知佢夠入味，皮滑肉嫩，難怪係店內招牌。

第二間荳子冰室，其實係BEANS旗下新開嘅餐廳，平日下午茶時段嚟到，經常見到2條人龍排隊，認真誇張@@叫咗個下午茶餐菠蘿包三文治，可以自選2款配料，餐肉同炒蛋是必須的！菠蘿包新鮮出爐熱辣辣，整體味道鹹鹹甜甜，不錯～忌廉溝鮮奶係cam man小時候嘅回憶，我第一次飲，覺得係少甜版嘅忌廉@@同韓國牌子嘅忌廉鮮奶有好大分別。荳子包係店內招牌，入面有吉士同紅豆，口感都算豐富（但菠蘿包更勝一籌）。最後加配咗一款細細個，以前得酒樓先食到嘅芒果花奶布甸，同兒時食嘅味道一模一樣，簡直係回憶殺！

第三間嚐糖，鋪面實在太細啦，如果係街外人過嚟搵食，好容易錯過咗都唔知，鋪頭主打各式各樣嘅糖水，最特別係，佢哋嘅糖水名稱好搞鬼。好似楊老師（即楊枝甘露）、涼校長（即西瓜沙冰）、紫薯正妹（即紫薯奶甜品）等，全部都好滑稽。楊老師入面有楊枝甘露、椰果同小丸子，口感豐富；而紫薯正妹有紫薯奶、芋圓、紫薯同西米，個人最鍾意紫薯正妹，相對冇咁甜，而且啲芋圓煙韌軟Q，同紫薯奶幾夾～

最後一間大小通吃，係開喺住宅樓下嘅小食店，唔係住附近嘅居民，都未必會識得去。小學嗰陣有同學住呢頭，每次去佢屋企玩，一定會嚟幫襯佢哋嘅炸曲薯條（當時曲薯條係比較少見），隔咗咁多年食番，味道一樣！剩係加淮鹽就已經好好食！除咗薯條，仲有其他小食，好似煎釀三寶，全部新鮮炸起，有唔少學生哥幫襯㗎。

大家又覺得將軍澳有咩好食呢？歡迎留言話我聽^^
記得今晚9點準時上YouTube睇片喇～

番茄18
地址：將軍澳澳南海岸至善街3號SAVANNAH Place 地下G05號鋪
麻辣番茄湯米線牛乳炒蛋配招牌瑞士雞髀 $56
紅綠椰冰 $15
@番茄18

荳子冰室
地址：將軍澳唐德街1號將軍澳廣場1樓1-005號鋪
下午茶餐J：菠蘿包三文治（炒蛋餐肉）$31
忌廉溝鮮奶 $9
荳子包 $13
芒果布甸 $16
@cafedebeans

嚐糖
地址：將軍澳寶盈花園商場地下S1B鋪
楊老師 $45
紫薯正妹 $42
@sheung.tong

大小通吃
地址：將軍澳富康花園商場51號鋪
炸曲薯條 $15/份
煎釀三寶 $12/4件

主持、撰文：Yvonne Lam
攝影、剪接：Doris Wong
美術：Jeffrey Lee

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=