繼上集同大家分享完頭3日嘅美食行程，今集繼續唔好俾佢停！今次嘅旅程俾我嘅感覺係每一日都有新嘅驚喜，你以為體驗到嘅嘢已經好新奇，食嘅食物已經好好味？去到第2日會再次刷新前一日嘅觀感，興奮程度直線上升！
今集唔單止食到好多第一次食嘅台式料料、傳統筵席菜、風味米其林之外，仲要遇到雨神降臨，由藍天白雲好天氣，突然變成滂沱大雨，搞到除鞋除襪赤腳行趕行程，當刻狼狽程度絕對100分，但就係因為呢啲突發意外，成為咗呢個旅程嘅一個珍貴回憶。
今集依舊食咗好多餐，精選咗幾間心水餐廳俾大家，記住要mark底啦！
第一間：份量超震驚 傳統台式宴席菜 @jinxia1940
唔知係咪因為嚟到台南嘅關係，明顯睇得出台南餐廳嘅用餐份量比台北係誇張好多！嚟到台式傳統餐館錦霞樓，呢度食宴席菜，第一道打頭炮嘅「十全十美」即係十小碟嚟迎接大家，咪以為係細細碟嗰啲前菜，原來每一碟都係主食份量……龍蝦、魚、湯……就連果盤都係超巨型，所有菜式要出動兩張枱先放得落，一行人食到嘩嘩聲，雖然個個食到眼神死（因為份量實在太多），但嘢食係好好味㗎！
錦霞樓
地址： 701台灣台南市東區中華東路一段366號2樓
第二間： 大廚發辦 無菜單平價台式家庭料理 @wg_fg
晏晝食咗間份量超浮誇嘅台式筵席菜，夜晚呢間就偏向家常菜料理多啲，店名叫冬瓜與胖子。呢度最特別係無菜單，老闆會根據當日心情，同買到嘅食材決定煮咩料理。，不過必定有嘅就係招牌菜「豬豬」，即係燉豬肉，佢嘅醬汁甜甜哋，好食到可以食兩碗飯！我哋一行人預訂咗11道菜1個湯，人均台幣$450,真係捧住個肚走。平時去台灣冇乜機會食到台灣家常菜，下次有機會一定要嚟幫襯～
冬瓜與胖子（需要預約，最少2人起）
地址：806台灣高雄市前鎮區英德街784巷12號
第三間：原住民料理 驚喜鐵板燒Fine Dining @mathariri_restaurant
大家對於原住民料理係咪比較陌生？位於屏東嘅Mathariri係開喺山入面嘅一間原住民餐廳，坐擁絕美山景，料理主要以鐵板嘅方式烹調。最初以為原住民料理一定係好「Raw」好樸素，食法比較原始，例如烤羊肉/生牛肉等。冇諗過竟然係Fine Dining級數。每一道料理除咗有精美擺盤，亦會有店員嘅詳細講解菜式係採用咩材料去煮，總之每道菜都好食，非常推薦大家去試吓！
Mathariri（需要預約）
地址：903台灣屏東縣瑪家鄉風景巷200號
第四間：Y小編是次旅程No.1餐廳 超好食法式料理@marc_l3
如果要我揀一間今個Trip最鍾意嘅餐廳，一定係Marc L³！佢係一間令客人真正享受到美食嘅餐廳，Marc L³雖然係一間法式餐廳，但入到去一啲拘束嘅感覺都冇，不論係主廚Marc定係員工，好親切主動咁同客人問候；建議坐樓下吧枱位置，可以睇到主廚烹煮嘅精采過程。法式9道菜料理，入面有我第一次食到鹿肉，冇想像中咁重臊味，我覺得仲好味過牛肉添！嚟高雄不吃絕對會後悔！
Marc L³（需要預約）
地址：高雄市前金區仁義街231號1樓
台灣觀光局味覺療癒之旅就今集完結，不過TF衝出香港，點會俾佢停！嚟緊仲有台灣美食片段同大家分享，記得下個星期準時YouTube睇片！
大家平時去台灣又會點玩點食？歡迎留言話我聽^^
主持、撰文：Yvonne Lam
攝影、剪接：Doris Wong
美術：Anita Lam
鳴謝：臺灣觀光協會香港辦事處 @ taiwan_ttbhk
TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=
#TF衝出香港 #臺灣觀光協會香港辦事處 #台北 #台中 #台南 #錦霞樓 #台菜 #冬瓜與胖子 #無菜單餐廳 #原住民餐廳 # Mathariri #預約制餐廳 #米芝蓮 #Marc L³ #法式餐廳 #鹿肉 #Fine Dining #台灣 #台灣美食 #台灣旅遊 #老字號 #下午茶 #TalkFood #TalkFood台灣
延伸閱讀：
#TalkFood【#18區搵食—TF衝出香港！去台灣6日食足23餐】多謝臺灣觀光協會邀請｜變身旅遊記者｜雙層巴士透明車頂 | 望住101嘆下午茶｜看症問診涼
