#TalkFood【#18區搵食—上水是個好地方！媲美澳牛光速鮮牛肉通+全港最好味冰柱紅豆冰＋關注組力推好好味流心班尼迪蛋】老字號廣成冰室｜必食名物紅豆冰｜仲有蛋香十足厚蛋治

#talkfood 【#18區搵食—上水是個好地方！媲美澳牛光速鮮牛肉通+全港最好味冰柱紅豆冰＋關注組力推好好味流心班尼迪蛋】老字號廣成冰室｜必食名物紅豆冰｜仲有蛋香十足厚蛋治｜煙韌滑溜魷魚蝦皮香菇櫃桶腸粉｜有冇食過美味豬膶蒸伊麵｜Cafe關注組推薦嘅Everglow Coffee｜Egg Benedict堅高質｜已經食唔到香蕉糕蛋糕｜興發餅家買古早糕餅

隔咗成個月，今日同大家嚟到上水搵食！上水曾經係一個超級水貨城，篋來篋往，不過今日嚟上水得一個目的：就係食！今次最想食嘅4間餐廳都非常滿意，想知係邊幾間？快啲睇埋落去啦～

第一間廣成冰室，未去過上水都一定聽過佢嘅大名，雖然網上風評麻麻，但山長水遠嚟到上水，點都要會一會呢間老字號！叫咗牛肉通粉同雞蛋三文治套餐，包一杯飲品，凍飲只需加$1！好平呀！牛肉通粉味道較淡，加啲胡椒粉落去味道更佳。蛋治味道好純粹，麵包有牛油香氣，夾住厚實嘅雞蛋，蛋香味幾足～最後當然點一杯紅豆冰，呢度嘅紅豆冰，碎冰放入錐形模入面，做成一個冰柱形狀，上面淋滿花奶，紅豆粒粒飽滿香甜，係我飲過全港最好味嘅紅豆冰呀！

第二間係好多街坊過嚟幫襯嘅廣式石磨腸粉，鋪面細細，客人相當多，老闆隻手冇停過。平時食腸粉唔係雞蛋腸就係牛肉腸，呢度比較特別，有魷魚蝦皮香菇腸粉。入口先被濃郁嘅菇味吸引，之後食到少少蝦皮同魷魚嘅鮮味，豉油有鹹、甜2款，必揀甜豉油！謹記一定要加埋佢哋嘅辣椒，香辣味俱全，愈食愈過癮～仲有係，主食居然有蒸伊麵，$25包一個餸，唔知係咪用櫃桶蒸過嘅關係，每條伊麵都好濕潤，配大量蔬菜同豬膶一齊食，再撈埋辣椒醬，完美！

第三間喺香港Cafe關注組大推嘅Everglow Coffee，好多人大讚呢間cafe嘅ADB同Egg Benedict值得一試。Egg Benedict果然不負眾望，堅好食喎！酸種麵包係脆嘅，荷蘭醬偏酸，質哋厚身，加埋完美嘅水波蛋，同煎出油嘅煙肉，除咗讚佢好食，我冇嘢好講。值得一提佢仲加咗少少蜜糖，鹹中帶微甜，我鍾意呀～～Purple Latte好多人誤以為係紫薯Latte，其實佢係薰衣草＋蝶豆花沖出嚟嘅飲品，味道一啲都唔假，輕微嘅薰衣草香氣，幾特別！

最後嚟到石湖墟市政大廈嘅興發餅家，本身諗住買佢哋嘅香蕉糕蛋糕，可惜老闆娘話師傅已經退休，以後都冇香蕉糕蛋糕食啦。好在仲有其他糕點，紫米茨實糕坊間好少見，入口質感乾身啲，得好淡嘅紫米味道；南瓜餅外皮煙韌軟糯，內裏包住香脆嘅花生粒，幾香口；豆沙香蕉糕冇想像中咁煙韌，容易咬開，味道偏甜@@試一次就夠！

大家又覺得上水有咩好食呢？歡迎留言話我聽^^

廣成冰室
地址：上水石湖墟新成路10號
牛肉通粉雞蛋三文治 $46
紅豆冰 $28

廣式石磨腸粉
地址：上水新成路88號海禧華庭地下37號鋪
魷魚蝦皮香菇腸粉 $22
蒸伊麵(包1餸) $25（豬潤）

Everglow Coffee
地址：上水智昌路8號順欣花園地下5A號鋪
Egg Benedict $68
Purple Latte $45

興發餅家
地址：上水智昌路13號石湖墟市政大廈1樓S10號鋪
紫米茨實糕 $15/5件
南瓜餅 $18/3件
豆沙香蕉糕 $10/2件

主持、撰文：Yvonne Lam
攝影、剪接：Doris Wong
美術：Anita Lam

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=