【18區搵食-太子搵食遇到史力加綠色「鬼口水」】真係正宗越南河｜湯底清甜牛肉多｜$88大大件壽司定食｜有齊沙律＋前菜＋麵豉湯｜涼浸浸清爽涼皮｜全部都係綠色甜品｜食過未？開心果糊｜Q彈動L開心果糕

嚟到太子搵食，今集去咗幾間唔同食店，仲有傳說中嘅史力加綠色「鬼口水」，大家睇完片會唔會想去試吓呢？

第一間月橋正宗越南湯粉，太子區內嘅高質小店，座位唔多，最好錯開繁忙時段就唔使排隊。非常正宗的招牌生牛肉湯河，一定要食河粉，河粉非常滑同幼身，湯底鮮甜不膩，加少少青檸同辣椒，再配粉紅色半熟牛肉，味道正宗又抵食！鍾意飲咖啡的話，記得要叫埋越南滴漏咖啡，煉奶加咖啡真係好正呀！

心思思想食壽司？第二間佐禾町居食屋，用$88就食到大大件嘅壽司定食，2款定食，今次揀咗B餐，配火炙壽司6件、卷物3件、沙律、前菜同麵豉湯，望落豐富之餘食材都好新鮮！堂食唔使加一，cp值極高！三文魚肥美，仲有大大粒帆立貝，想平平哋食日本嘢，呢間食得過。

第三間係兩姊妹涼皮有限公司，雖然係外賣店，一向都好多人排隊幫襯。天氣太熱想食啲凍嘢，涼皮就啱晒～內有大量青瓜絲同芫荽，入口清爽，加埋少少辣汁，好開胃！椒麻雞聽人講好好食，但今次食完有啲失望，唔夠麻，味道似係冇咁辣嘅口水雞。

最後嚟到老牌糖水店蘭苑饎館，見過無數人打卡佢哋嘅「鬼口水」，今次終於可以嚟潮聖喇～「鬼口水」其實係開心果糊，採用伊朗開心果，望落一Pat嘢質地濃稠，所以俾人話似鬼口水。質感似糊仔，開頭只有甜味，隔一陣開心果味慢慢出番嚟，幾特別嘅～同場加映開心果凍糕，好動L，開心果味唔太濃，試一次打卡就好了。

月橋正宗越南湯粉
地址：太子界限街39號地鋪
招牌生牛肉湯河 $55
越南滴滴咖啡 $25
佐禾町居食屋
地址：太子荔枝角道104號地鋪
壽司定食B $88 （1800後堂食+$30）

兩姊妹涼皮有限公司
地址：太子柏樹街15號地鋪
招牌兩姊妹涼皮 $29
椒麻雞 $52

蘭苑饎館
地址：太子西洋菜北街318號集賢樓地鋪
開心果糊 $38
開心果糕 $20

主持、撰文：Yvonne Lam
攝影、剪接：Doris Wong
美術：Anita Lam