【18區搵食-近期爆紅米線特輯之超惡劣環境滴住水都要食米線】有個川字都好味嘅米線店？｜世一豬頸肉｜砂鍋醉藥雞｜平記富金軒雲南米線｜即叫即煮黃酒醉雞米線

【18區搵食-近期爆紅米線特輯之超惡劣環境滴住水都要食米線】有個川字都好味嘅米線店？｜世一豬頸肉｜口水雞個汁贏晒｜砂鍋醉藥雞｜醉三鮮｜平記富金軒雲南米線｜即叫即煮黃酒醉雞米線

川之味結業後，有唔少食客感嘆以後都冇世一豬軟骨同勁辣湯底米線食，不過好食嘅米線除咗川之味，都仲有其他選擇。今集化身米線師，帶大家食勻3間米線！

正所謂有個「川」字都好味嘅米線，第一間係川品雲南米線，鋪位細到如果你喺街邊經過，有機會miss咗佢嘅存在。就咁睇門面細，但原來入面仲有多一個鋪位。川之味有世一豬軟骨，川品有世一豬頸肉！豬頸肉即使被湯浸泡過，但都保持彈牙爽口，嚟到必點！同場加映口水雞，佢個辣汁贏晒全世界，麻得嚟夠辣，同埋好開胃，用佢啲汁嚟撈飯簡直一流！

另一間醉藥雞，主打砂鍋米線。砂鍋醉藥雞湯底加咗米酒、薑、木耳，紅棗同淮山配料煮成，飲落有微微酒味，天氣時凍時熱，食番碗暖吓胃就啱晒。而且雞件大嚿夠嫩滑，不錯。強烈推薦佢哋嘅醉三鮮，個花螺真係甜到六親不認！公認最好食嘅花螺，完勝鮑魚同鮮蝦！

最後一間平記富金軒雲南米線，可以話係香港米線關注組寵兒之一，得到唔少谷友推介。位置唔近地鐵站，加上近日天氣潮濕，環境真係超惡劣，除咗地下濕，頭上仲周不時有水滴落嚟，真係滴住水都要食米線。雖然環境一般，但都無阻米線控過嚟搵食，keep住都有食客入嚟幫襯～今次試咗最多人推薦嘅黃酒醉雞米線，見到佢哋米線全部即叫即整，雞件份量比得毫不手軟，食極都仲有，湯底濃稠更有酒香，一個字，正！

川品雲南米線
大角咀晏架街77號富多來商場二期地下6號鋪
豬頸肉腩肉米線 $53
口水雞 $40

醉藥雞 (福榮街)
深水埗福榮街103號地鋪
砂鍋醉藥雞 $68 （煮雞酒）
醉三鮮（鮑魚、蝦、花螺）$75

平記富金軒雲南米線
佐敦寶靈街17號官涌市政大廈2樓熟食中心CF4號鋪
黃酒醉雞米線 $44

延伸閱讀：
【吃好吃】排足個半鐘 3/31川之味最後世一豬軟骨@川之味
https://www.instagram.com/p/CbowxTdI82m/

【18區搵食-灣仔名物老字號茶餐廳＋脆皮燒春雞】

https://www.youtube.com/watch?v=30GuCCvgBmw

【18區搵食-灣仔鵝頸熟食中心】

https://www.youtube.com/watch?v=PAGYavyz0ig

【18區搵食-上環隱世咖喱炒飯＋茶檔薄脆西多】

https://www.youtube.com/watch?v=mPqyvafYKtg

【18區搵食-天后藥饍牛腩麵＋厚燒牛舌飯】

https://www.youtube.com/watch?v=9eMa9ON6KoM