【18區搵食-大圍2.0之堅隱世村屋蛋包飯】大圍必食2間人氣麵店｜似日本拉麵湯底嘅棉花雞｜cafe米線店？｜被米線耽誤嘅炸物店｜隱世村屋蛋包飯｜真嫩滑香濃蛋包飯｜大圍第一麵包店｜早起的鳥兒有包食

【18區搵食-大圍2.0之堅隱世村屋蛋包飯】大圍必食2間人氣麵店｜似日本拉麵湯底嘅棉花雞｜cafe米線店？｜被米線耽誤嘅炸物店｜隱世村屋蛋包飯｜真嫩滑香濃蛋包飯｜大圍第一麵包店｜早起的鳥兒有包食｜甜酒釀麻糬米貝果｜去到邊都有沙嗲牛

入到嚟大圍，終於試到啲好出名嘅人氣熱店！今次好彩，幾間都唔使點排隊，一齊食爆大圍2.0！

第一間好湯好麵，高峰時期排2個鐘絕不誇張！皆因呢一碗麵「棉花雞」嘅湯底係會令你一口接一口停唔到，最後成碗清晒xd，有啲似日本拉麵湯底但絲毫不膩。棉花雞用日本雞肉，嫩滑得嚟又帶啲彈性。棉花即魚肚，好似海綿咁，每一嚿都吸滿湯汁，入口大爆發，超正！

另一間同樣係排隊人氣店，肆年八月米線專門店，最近轉咗新鋪，外面睇勁似cafe，木系裝修同開揚設計，估唔到原來係食米線。叫咗招牌麥芽啤酒滷雜滙小鍋米線配金銀蛋芫荽湯，分量激大！麥芽啤酒滷雜滙包括滷鴨片、滷豬腸、滷雞腎、滷蛋，款款入味！仲有quota嘅話，一定要叫佢啲炸物試吓，手切地瓜薯條好香，外層炸衣薄，香脆內軟，必點！

喺肆年八月米線嘅斜後面，有一間隱身於村屋嘅日本洋食屋，位置唔多，有超多學生幫襯！呢度嘅蛋包飯出色，切嘅時候記住唔好切太深，將雞蛋慢慢反出嚟，就會變成完美嘅蛋包飯！嫩滑嘅雞蛋配上甜辣嘅明太子奶醬，唔需要任何配菜都非常美味，內心os：好好食呀！

最後一間雖然唔係甜品，但麵包店都同樣吸引！Dear Coffee & Bakery每個月會有當月麵包限定款式，最齊包款嘅時間係朝早10點至11點，真係早起嘅鳥兒有包食～慢少少去到想食嘅款式就會冇晒:( 三重芝士沙嗲牛熱狗，嗱，真係同佢個名一樣，冇太驚豔，正常發揮。相反甜酒釀麻糬米貝果就好有驚喜！面頭嘅脆脆好似米通，內有大嚿軟糯麻糬，帶有輕微甜酒味道，比想像中更出色！

好湯好麵
地址：大圍積存街20號地鋪
棉花雞 $98

肆年八月米線專門店
地址：大圍上徑口村148號地下
麥芽啤酒滷雜滙小鍋米線配金銀蛋芫荽湯 $62
手切地瓜薯條 $38

ADO洋食屋
地址：大圍上徑口村15號地下
明太子奶醬蛋包飯 $98

Dear Coffee & Bakery
地址：大圍田心街20號雲疊花園商場地下7號鋪
甜酒釀麻糬米貝果 $45
三重芝士沙嗲牛熱狗 $68

更多文章