#TalkFood【#18區搵食‑‑元朗掃街驚喜！巷子裏爆餡章魚燒】黑松露醬章魚燒超好食｜生煎包個底脆到｜半煎炸蠔餅｜蠔餅配辣醬＋芫荽係perfect池｜入元朗必飲夏茶｜開心果醬超濃厚｜#元朗3.0

好耐冇同大家一齊出去搵食喇，今日嚟到元朗掃街！有章魚燒、生煎包、蠔餅同埋必飲嘅夏茶！每間各有特色，有啲仲係巷子美食，下次嚟元朗可以跟住呢集去掃街啦～

第一間麴町，就係隱藏喺巷仔入面，位置唔算好難搵，要睇實地圖先唔會搵錯路～呢度有多款口味嘅章魚燒，最多人推薦嘅蟹膏蟹籽同黑松露章魚燒。雖然價錢有啲小貴，1份8 粒$50+，可雙併，但食完之後，覺得收呢個價都唔太過份！章魚燒即叫即整，等大概15分鐘左右，上面淋咗好多蟹膏醬，仲撒埋脆卜卜嘅蟹籽，口感豐富！

個人大推黑松露章魚燒，同樣淋咗大量黑松露醬，個醬好濃厚好滑身，咬開粒粒章魚燒，入面有超大粒章魚@@一個人食一份好滿足，想encore試埋佢其他口味～

第二間賀苗記包點，出名食生煎包同鍋貼，賣相望落好似普通咗啲，估唔到食入口有驚喜喎！尤其係個生煎包，包底脆到好似食緊炸饅頭，入面肉餡新鮮，雖然唔係入口爆汁嗰種，反而係正宗做法，絕對唔影響味道發揮。鍋貼肉餡更勝一籌，充滿油香，食嗰陣唔覺油膩，幾好食喎！

第三間肥姐蠔餅婆，呢間專食蠔餅嘅小食店，全香港真係冇幾多間，Y小編讀書時期拉埋同學入嚟食過，可以話係元朗名物！蠔餅用半煎炸方法，食落非常香脆。加埋佢哋嘅泰式酸辣汁先係重點，客人自己加，不過留意，個醬真係幾辣吓，個人認為有譚仔5小辣，食唔到太辣嘅話，落少少好喇，不過有咗泰式酸辣汁，加埋芫荽，呢個蠔餅組合，真係開胃又惹味！芫荽仲可以減輕蠔餅嘅油膩感，間唔中食一次肥仔煎炸嘢，都咪話唔滿足。

最後去嘅夏茶，喺元朗有2間分店，必飲銷量No.1芝士開心果鮮奶！每日限量供應，底層落咗超多日本開心果醬，面頭加咗開心果碎，飲一啖，成個口都被開心果味包圍，即使有芝士奶蓋都唔會話好甜膩，輕輕鬆鬆十分鐘ko咗成杯；另一杯香印大滿足，果香味偏重，仲食到提子果肉，果然嚟元朗一定要飲夏茶！

大家平時去元朗會去邊度掃街？歡迎留言話我聽^^

麴町
地址：元朗鳳攸南街3號好順景大廈地下48號鋪
蟹膏蟹籽+黑松露章魚燒 $58/8粒（雙併+$2）

賀苗記包點
地址：元朗大陂頭徑14-24號福星樓地下2B號鋪
生煎包 $20/3隻
鍋貼 $15/3隻

肥姐蠔餅婆
地址：元朗教育路68號兆豐樓地鋪
馳名蠔餅 $40/件

夏茶
地址：元朗炮仗坊36號地鋪
芝士開心果鮮奶 $45
香印大滿足（寒天） $48

主持、撰文：Yvonne Lam
攝影：Peter Li、Fong Ka Him
剪接：Peter Li
美術：Anita Lam
嘉賓：Sharon Chan

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood

全自費真實食評，內容反映當日質素，並非廣告！最新價格以餐廳為準。

#章魚燒 #蟹膏蟹籽章魚燒 #蟹膏蟹籽 #黑松露 #黑松露章魚燒 #麴町 #賀苗記包點 #生煎包 #鍋貼 #肥姐蠔餅婆 #蠔餅 #夏茶 #香印大滿足 #寒天 #芝士開心果鮮奶 #元朗 #元朗美食 #街坊小店 #老字號 #食晏 #外賣 #下午茶 #18區搵食 #TalkFood #TalkFood元朗