【18區搵食-由早食荽食到晚 芫荽大行動】芫荽控要睇｜成條片都被芫荽包圍｜隔住個mon都聞到浸味｜鍾意嘅人會好鍾意｜唔鍾意嘅就唔好意思了｜極澎湃芫荽山漢堡｜飽滿餡料芫荽餅｜超荽雞湯麵｜芫荽三重奏勁茜麵｜芫荽三文魚蛋批｜多食芫荽身體好
唔知呢度有冇鍾意食芫荽嘅朋友仔呢？Y小編作為芫荽控，今集為大家帶嚟滿滿嘅芫荽食物！已經想像到條片一出街，應該會收到好多留言@@鍾意食芫荽嘅朋友，可以save低之後慢慢食～唔鍾意芫荽嘅朋友，要同你哋講聲唔好意思啦！
第一間係中環新開嘅漢堡店Bored Garden，呢度有一款芫荽芝心牛肉漢堡，比較特別嘅係，佢嘅芫荽係炸過嚟㗎@@漢堡中間滿滿芫荽，保證各位芫荽控食完大滿足！炸過嘅芫荽，味道稍稍褪減少少，荽味冇咁突出，反而有啲似零食脆卜卜咁，連埋芝士流心牛肉漢堡一齊大啖咬落去，真係又荽又邪惡呀！
第二間位於土瓜灣嘅日昇小食，呢度嘅足料芫荽餅同韭菜餅好鬼出名，每塊芫荽餅兩面煎至金黃，餡料爆棚，除咗芫荽仲會有埋肉碎，皮夠薄，入口香脆！唔好睇塊餅細細塊，其實入口好夠芫荽味！
第三間嚟到鳳鳴居，雖然主打醉雞湯米線，其實呢度有個芫荽雞湯麵好多人都讚好食，睇網上圖片見到芫荽極多，多到遮住底下塊雞件，滿心期待，可惜見到自己嗰碗，點解芫荽好似少咗咁嘅@@有少少失望，而且芫荽味道同湯底好似分開咁，味道融合唔到，雖然有芫荽味，但食完好唔多滿足:( 大家嚟鳳鳴居都係食返醉雞湯米線啦～
第四間去到維港灣餃子坊，知道佢哋有個勁荽麵，有芫荽湯底、芫荽餃子、仲有芫荽做嘅麵@@簡直係芫荽三重奏，諗得到嘅每個部份，都有芫荽加埋落去！呢個麵比起鳳鳴居，簡直好味太多了！芫荽突出之餘，同個湯底好夾，雖然相對起來，餃子冇咁重荽味，但粒粒爆餡，好食！
最後一間四喜麵包西餅，嚟到即刻order芫荽芝士包同芫荽三文魚蛋批，收錢嗰陣店員都忍唔住講咗句：「你真係好鍾意食芫荽喎！」芫荽芝士包雖然佈滿芫荽碎，但入口居然冇芫荽味，只食到芝士味，點解會咁㗎……相反芫荽三文魚蛋批就夠晒荽，配埋鹹香嘅三文魚，估唔到幾夾幾好食喎！
Bored Garden
地址：中環威靈頓街71號地下
芫荽芝心牛肉漢堡 $125
小食套餐 +$18
日昇小食
地址：土瓜灣馬頭圍道428號地下鋪
足料芫荽餅 $22/3件
鳳鳴居
地址：旺角西洋菜南街138號地下2號鋪
芫荽雞湯麵 $56
維港灣餃子坊
地址：元朗教育路77號京都閣地鋪
勁荽麵 $55
四喜麵包西餅
地址：尖沙咀柯士甸道105號地鋪
芫荽芝士包 $15
芫荽三文魚蛋批 $30
主持、撰文：Yvonne Lam
攝影、剪接：Doris Wong
美術：Anita Lam
TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=
延伸閱讀：
【18區搵食-慈雲山美食多蘿蘿】
https://www.youtube.com/watch?v=Lq2pICsCPzI
【18區搵食-食勻柴灣最出名4間餐廳】
https://www.youtube.com/watch?v=raQqjtzbm34
【屯門家姐帶路之岑珈其帶路屯門一日遊】
