【車仔麵家姐嘉宏帶路——食勻私心最愛3間車仔麵】文記車仔麵長期人龍｜直擊叫餸過程｜上環打工仔最愛車仔麵店｜車仔麵必食麵底？｜你叫我食零默契｜加辣汁是常識吧｜車仔麵一定要有咩餸？｜半日食3碗麵菜底係偉大發明
上集繼屯門家姐岑珈其帶路去屯門搵食，今集搞搞新意思，唔做「地區」家姐，專做一款「美食」家姐。今次有之前參加過真人騷「戀愛Staycation」嘅嘉宏帶路，佢平時最鍾意食車仔麵，高峰時期一星期仲會食足5日咁多，今集由佢發辦，食勻港九新界3間車仔麵，全部深得「宏心」～
第一間嚟到深水埗文記車仔麵，一條街連開4間舖就知有幾把炮。嘉宏話之前成日嚟深水埗整波衫，食完一次覺得好食，自此嚟開深水埗都一定幫襯。入到去直接係檔口叫嘢食，記得要先揀麵底再揀餸。嘉宏同Y小編一致認為，嚟文記必食瑞士汁雞翼，煮得夠入味，一咬即脫骨真係好正！
第二間麵尊，係嘉宏之前返pt成日都會食嘅車仔麵，麵尊有2種辣；咖喱辣同麻辣，嘉宏推薦咖喱辣，配魚蛋同牛柏葉一齊食，咖喱味好出好濃！嚟到，特別啲，嘉宏同Y小編玩個小遊戲，互相幫大家叫餸，嗱！完全冇做馬㗎！因為嘉宏叫咗我唔食嘅豬皮，結果佢自己食返晒。值得一讚麵尊嘅辣汁係有啲料到，愈食愈辣愈過癮呀！
最後一間嚟到嘉宏私心最愛嘅大埔郭仔記，食咗接近過百次，食嘅已經唔係車仔麵咁簡單，而係情懷同回憶。佢中學喺大埔讀書，郭仔記又近自修室，試過晏晝食完夜晚再食！因為食到太飽嘅關係，我哋都轉咗菜底，通菜夠爽好味道，陳皮魚蛋入味，仲有冬菇都好好食呀！而且呢度嘅職員好友善，大埔人真係好有愛呀！唔怪之得嘉宏咁鍾意食啦～
今集好開心有嘉宏帶我食勻港九新界3間車仔麵，雖然飽到飛起，但每間車仔麵都各有特色，不論係餸、麵底定係醬汁，間間都有佢嘅過人之處，你哋又有冇邊幾間車仔麵推薦？
唔准諗即刻答：車仔麵一定要食咩餸？
*特別鳴謝車仔麵家姐—林嘉宏 @kawanglam
文記車仔麵
地址：深水埗福榮街121號地下
麵尊
地址：上環蘇杭街22-24號1號鋪
郭仔記
地址：大埔大榮里42-44號美發大廈地下
撰文、主持：Yvonne Lam
攝影：Doris Wong、Peter Li
剪接：Doris Wong
美術：Anita Lam
延伸閱讀：
【屯門家姐帶路之岑珈其帶路屯門一日遊】
https://www.youtube.com/watch?v=EEP_K4Gf8dI
【大埔家姐帶路之大埔名物尖叫系列】
https://www.youtube.com/watch?v=cb0E19ACNRg
【長洲家姐帶路之長洲2.0】
