【18區搵食-銅鑼灣4間人氣刨冰店，邊間最好食？】泰國人氣甜品店｜芒果糯米飯刨冰｜精粹係上面嘅炒綠豆｜Shari Shari波波冰｜落大雨都勁多人排隊｜白玉煙韌好味道｜Life Dessert

【18區搵食-銅鑼灣4間人氣刨冰店，邊間最好食？】泰國人氣甜品店｜芒果糯米飯刨冰｜精粹係上面嘅炒綠豆｜Shari Shari波波冰｜落大雨都勁多人排隊｜白玉煙韌好味道｜Life Dessert｜西瓜同荔枝真係唔夾｜甜姨姨私房甜品｜聯乘海邊走走奶醬脆多冰

雖然呢排都係落雨天，但天氣一樣咁熱，點可以唔去食冰消暑呢！今集幫大家集合4間銅鑼灣刨冰店，食齊佢哋招牌口味，即睇邊間最好食、最抵食啦～

第一間After You Dessert Café，很多人都話晏咗少少去都要排隊，不過拍攝當日可能因為搭正12點＋落雨嘅關係，居然唔使排就入得～嚟到就要食芒果糯米飯刨冰，睇落好細個，價錢亦係四間最貴。用咗泰國運嚟嘅冰磚，啲冰入口真係好幼細同滑，最底有軟糯嘅糯米飯同清甜芒果，加上面頭嘅炒綠豆，入口鹹甜鹹甜，確實好食！

第二間Shari Shari Kakigori House 氷屋係銅鑼灣另一間人氣冰店，細舖搬大舖依然人氣不減， ，犀利犀利。叫咗Best Seller抹茶忌廉焦糖配白玉，採用純淨日本水製冰，刨冰入口即化，食之前枱面會有個指引，大家唔好掛住相機食先，記得要盡快享用！抹茶醬同焦糖味好夾，食到入面仲會有啲餅乾碎增加口感，正呀！

第三間Life Dessert，係Life Toast嘅嘅姊妹店，夏日限定推出一款西瓜荔枝雪花冰，賣相唔錯，不過食落就⋯⋯單係西瓜冰係可以嘅，加埋荔枝就好似怪怪哋，唔多夾咁@@大家想嚟試。下次可以試下其他味道～

最後一間甜姨姨私房甜品，佢哋嘅刨冰經常係IG出現，最近聯乘海邊走走，推出一款奶醬脆多刨冰，第一啖確實幾濃花生味，但之後會愈食愈淡，不過價錢平，料多，性價比最高！

總括嚟講，Y小編覺得No.1嘅刨冰店係Shari Shari Kakigori House 氷屋，雖然唔係最平，但料多好味道，難怪人人大讚！最鍾意佢哋嘅刨冰每款入面都會有唔同嘅配料，每次食唔同味都有唔同嘅驚喜，俾個Tips大家！唔想排隊建議2-3點去喔～

After You Dessert Café
地址：銅鑼灣登龍街52號景隆商業大廈地鋪
芒果糯米飯刨冰 $148

Shari Shari Kakigori House 氷屋
地址：銅鑼灣加路連山道13號地鋪
抹茶忌廉焦糖配白玉 $105

Life Dessert
地址：銅鑼灣希雲街14號地鋪
西瓜荔枝雪花冰 $108 （夏日限定）

甜姨姨私房甜品
地址：銅鑼灣耀華街11號地鋪
奶醬脆多 $98

主持、撰文：Yvonne Lam
攝影、剪接：Doris Wong
美術：Anita Lam

延伸閱讀：

【18區搵食-太子搵食遇到史力加綠色「鬼口水」】

https://www.youtube.com/watch?v=zja0FAnXeRo

【18區搵食-嚟葵芳唔去葵廣搵食之大熱天時34度高溫都要食佢？！】

https://www.youtube.com/watch?v=wDem4WOCS-U

【18區搵食-牛頭角都有精緻日餐＋$138一件蛋糕？】

https://www.youtube.com/watch?v=GGzpMm6PJDo