再次嚟到荃灣搵食，不過今日唔掃街，而係有其他目的！幾間餐廳全部都有驚喜，解鎖咗好多新體驗～想知係邊幾間餐廳，快啲睇埋落去啦～
第一間嚟到好出名嘅端記茶樓，呢間係好多行山友必定過嚟飲茶嘅地方，不過我呢個懶人都係的士直達㗎喇。入到端記茶樓，同平時飲茶好唔同，因為呢度所有嘢都係自己嚟。自己拎茶壺沖茶、拎熱水洗餐具，自己拎點心，突然仲會開咪廣播，有咩點心新鮮出爐等等。就算雞手鴨腳唔識做，員工都好有耐性咁教你，一啲都唔會嫌你煩！呢度嘅蝦餃、茶果仲有西洋菜好出名，不過依家西洋菜唔啱季節食唔到，嗌咗腐乳通菜都好好食！腐乳醬味道好似濃縮咗50倍咁，蘸少少已經好夠味。茶果煙韌，內裏嘅餡料好full，仲有奶黃流心馬拉糕，中間夾住一層奶黃醬，真係好滑好香，強烈推薦俾未嚟過端記茶樓嘅大家過嚟飲茶！喺呢度，不論食客定員工，對到眼就會好自然打招呼講早晨，收穫滿滿嘅人情味！
第二間流浮山窯燒雞，燒雞預先要風乾24小時，客人打電話先預訂，鋪頭收到order，就放落300幾度嘅窯燒45分鐘。拎出嚟嘅燒雞真係十級香！入口食到荔枝柴香煙燻過嘅味道，唔單止雞髀滑，連雞胸都係滑㗎！雞皮燒至焦脆，脂肪位嘅油香真係好正！嚟呢度食燒雞，記得要配桂花車厘茄一齊食，一凍一熱，加上浸到入味嘅桂花車厘茄，酸酸甜甜，又有陣桂花香，好夾呀！
最後一間大良鴻輝記，絕對係荃灣老字號，街坊由細食到大。今次試咗招牌三寶中嘅兩寶，芝麻糊雙併合桃糊，個人覺得合桃糊更出色！入口好幼滑，配上濃郁嘅芝麻糊，果然係精彩出品！外號叫做健康到顛嘅凍椰香藜麥紫米露，加咗藜麥口感更加豐富，好有咬口，椰味幾突出，記得要額外加佢哋嘅芝麻湯圓，入面嘅芝麻沙沙口感，超正！
大家平時去荃灣又有咩好食？歡迎留言話我聽^^
端記茶樓
地址：荃灣荃錦公路川龍村57-58號
流浮山窯燒雞
地址：荃灣運通街6號運通洋樓地下K號鋪
流浮山荔枝柴窯燒雞 $198/隻
桂花車厘茄 $38
大良鴻輝記
地址：荃灣川龍街8號鋪
芝麻糊雙併合桃糊 $22
加芝麻湯圓兩粒 $7
凍椰香藜麥紫米露 $25
主持、撰文：Yvonne Lam
攝影、剪接：Doris Wong
美術：Anita Lam
TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=
#飲茶 #端記茶樓 #蝦餃 #茶果 #雞屎藤 #馬拉糕 #西洋菜 #豆腐花 #大帽山 #川龍 #早茶 #流浮山窯燒雞 #窯燒雞 #燒雞 #荔枝柴 #桂花車厘茄 #大良鴻輝記 #椰香藜麥紫米露 #紫米露 #芝麻糊 #合桃糊 #芝麻湯圓 #荃灣 #荃灣美食 #街坊小店 #老字號 #食晏 #外賣 #早餐 #下午茶 #18區搵食 #TalkFood #TalkFood荃灣
延伸閱讀：
【#18區搵食—沿海18號巴士路線出發西營盤搵食 尖叫10秒超近無敵海景！】
https://www.youtube.com/watch?v=0_obD9b_q78
更多文章
【18區搵食-新蒲崗搵食2.0】今集太亢奮語速快咗少少請見諒｜最愛新蒲崗｜乾炒粒粒通粉料多鑊氣重｜手打牛筋丸有口感｜慢煮手撕豬腩窩夫｜鹹窩夫絕唔輸甜窩夫｜唔食Y小編會嬲系列｜老闆有態雞蛋仔
【18區搵食-石峽尾餃子店必食馳名手撕雞飯】Y小編私心推薦｜辣汁最強｜出色虎皮鳳爪｜平日去cafe成功包場｜超強拉絲芝士漢堡｜自家餃子唔係食餃子｜辣菜脯係重點｜厚肉鰻魚飯
#TalkFood【#18區搵食—上水是個好地方！媲美澳牛光速鮮牛肉通+全港最好味冰柱紅豆冰＋關注組力推好好味流心班尼迪蛋】老字號廣成冰室｜必食名物紅豆冰｜仲有蛋香十足厚蛋治
【18區搵食-去荃灣唔食米線食車仔麵？！】去香車街市唔食老闆娘雲南米線｜肥媽屋撈麵｜唔使排隊嘅嘉樂冰廳｜蛋牛治真係成本字典咁厚？｜謙虛的小奄列｜台灣過江龍蛋餅王｜黯然銷魂叉燒蛋餅｜是日最佳鮮芋泥豆乳
