【18區搵食-初遊佐敦之仙跡岩「真係咁伏」？】八零九零集體回憶｜全港第一間珍珠奶茶｜一定要轉京麵！｜MOMO餃子有驚喜｜蘸滿辣粉噴火炸雞｜佐敦有2間X龍咖喱｜亞龍咖喱先係始祖｜新食法咖喱牛腩配甜薄餅

【18區搵食-初遊佐敦之仙跡岩「真係咁伏」？】八零九零集體回憶｜全港第一間珍珠奶茶｜一定要轉京麵！｜MOMO餃子有驚喜｜蘸滿辣粉噴火炸雞｜佐敦有2間X龍咖喱｜亞龍咖喱先係始祖｜新食法咖喱牛腩配甜薄餅｜亂咁嚟燒賣有啲咩？｜黑人問號之朱古力脆皮忌廉燒賣

今集嚟到佐敦搵食，終於唔係2.0喇！對佐敦嘅印象純粹覺得佢好方便，位於尖沙咀同油麻地之間，唔怕搵唔到好嘢食～

第1間嚟到仙跡岩，相信係好多八零九零嘅集體回憶！細細個成日去仙跡岩食lunch，原來全港仲有4間分店，未執晒㗎！估唔到平日去到，lunch大爆場，特別多學生幫襯@@Camman推薦一定要轉台灣京麵，係粗身版嘅粉絲，好滑身，又幾特別。同埋要飲熱珍珠奶茶xdd聽聞係好飲啲㗎～雖然大家都話仙跡岩係劣食餐廳，但今次自己試完又未去到好難食喎。

第2間MOMOME係一間尼泊爾快餐店，尼泊爾人叫餃子做momo，momo$20有6隻，$30有10隻，即叫即蒸，絕對平靚正，外表同包法同我哋食開嘅一樣，係材料有少少唔同，餡料加咗牛油、芫荽同香葱等，香料味幾重，人手包得比較鬆身，唔係紮實嗰種，配埋秘製辣醬幾好食！仲有蘸滿辣粉嘅噴火炸雞，自稱Spicy King嘅大家可以去挑戰下，個辣係另一種有層次嘅辣，食唔到辣嘅都係叫返原味啦。

第3間亞龍咖喱，呢間餐廳有段故，事關你去到會見到2間咖喱店，分別係阿龍咖喱同亞龍咖喱，聽聞亞龍咖喱先係始祖，中間發生咗啲咩唔係重點，重點係亞龍咖喱嘅咖喱真係幾得！面頭有大量洋葱，食落除咗有咖喱嘅香料味，仲有洋葱嘅清甜，配埋軟腍牛腩，一個字，正！另外甜薄餅都唔錯～同咖喱牛腩一齊食，會有意想不到嘅口感添～

最後一間糖水雄係今集嘅壓軸重頭戲！就係為咗佢哋個朱古力脆皮忌廉燒賣而嚟@@聽落好似好伏，但食落係得朱古力味，反而食唔到燒賣本人，幾有創意嘅。相反亂咁嚟燒賣真係亂咁嚟，入面嘅材料咩都有啲，好似：菠蘿、火腿絲、雜菜等等，加埋XO醬去炒，夠惹味！最後試埋薄荷朱古力西米露，包你即刻醒神晒！

仙跡岩
地址：佐敦佐敦道5號至秀商業大廈一樓
花枝丸麵線 $36 （轉台灣京麵+$3）
熱珍珠奶茶重量級 $34 （跟餐半價優惠 $17）

MOMOME
地址：油麻地廟街235號地鋪
Momo $20/6pcs (chicken cheese)
Combo Lunch Set $45
L4 2pcs Drumsticks + Rice + Soft drinks（原味炸雞轉做辣炸雞，白飯轉薯條）

亞龍咖喱
地址：佐敦吳松街93號A地下
咖喱牛腩飯 $72
甜薄餅 $20

糖水雄
地址：佐敦渡船角文匯街30號文景樓地鋪
亂咁嚟燒賣 $28
朱古力脆皮忌廉燒賣 $28
薄荷朱古力西米露 $40

主持、撰文：Yvonne Lam
攝影、剪接：Doris Wong
美術：Anita Lam

【18區搵食-初遊佐敦之仙跡岩「真係咁伏」？】八零九零集體回憶｜全港第一間珍珠奶茶｜一定要轉京麵！｜MOMO餃子有驚喜｜蘸滿辣粉噴火炸雞｜佐敦有2間X龍咖喱｜亞龍咖喱先係始祖｜新食法咖喱牛腩配甜薄餅

更多文章