【18區搵食一年一度情人節打卡系日式梳乎厘班戟伏唔伏？！】氹女朋友系列｜男友friendly全黑梳乎厘｜No.1空氣感滿分梳乎厘｜瀑布梳乎厘｜平價後巷梳乎厘｜#真實食評冇廣告

【18區搵食一年一度情人節打卡系日式梳乎厘班戟伏唔伏？！】氹女朋友系列｜男友friendly全黑梳乎厘｜No.1空氣感滿分梳乎厘｜瀑布梳乎厘｜法國藍帶廚師主理｜每日限定金箔Nutella梳乎厘｜平價後巷梳乎厘｜榴槤控要試D24榴槤忘返梳乎厘｜#真實食評冇廣告

0:00 開場白
0:53 Four O Five Coffee & Eatery
3:15 JOY LITM
6:28 TERA
9:10 南山梳乎厘
12:34 總結

一年一度嘅情人節又到啦，情人節又點少得甜品？上年同大家介紹4間唔同風格嘅Tiramisu，今年不如介紹大家4間各有特色嘅日式梳乎厘班戟～未諗到帶女朋友去邊度食甜品？呢度俾埋答案你抄喇！

第一間係觀塘新開無耐嘅Four O Five Coffee & Eatery，店內推出一款獨家限定全黑色梳乎厘班戟，黑色梳乎厘班戟用咗竹炭粉、朱古力吉士同乳酪製作，整體食落冇咩特別味道，就係一般甜味嘅梳乎厘，側邊嘅餅碎同紅莓乾，增添口感，梳乎厘空氣感十足，切開蛋香味隨之飄出。全黑色嘅型格外表，對男士非常友好，唔怕太girly顯得自己格格不入。

第二間JOY LITM，呢度主打噱頭係瀑布梳乎厘，話明瀑布，即係爆醬效果，慢慢拎起圍住梳乎厘嘅透明膠，入面嘅cream就好似瀑布咁爆發出嚟，視覺效果滿分，打卡一流。顏色搶眼嘅紅絲絨梳乎厘班戟，整體偏甜，不過空氣感係勁到，一擺入口一秒自動融化，好似雲朵咁輕巧。情人節限定仲會有個花花棉花糖，食完真係甜入心喇。

呢一間TERA，由法國藍帶廚師主理，梳乎厘班戟口味選擇較多，今次揀咗每日限定嘅金箔Nutella梳乎厘，入面有可可豆榛果醬、金莎朱古力脆脆同金箔，賣相靚仔，金莎醬甜而不膩。梳乎厘明顯煎得金黃，面層嘅蛋糕體實在得嚟，中間做到十足空氣感，如果唔鍾意空氣感重嘅朋友，呢款啱晒你。

最後嚟到南山梳乎厘，呢間位於深水埗元州街嘅小店，梳乎厘價錢實惠！平時去啲靚靚café食，起碼過百蚊，呢度環境一般，只係放咗幾張摺枱喺後巷俾客人坐底食梳乎厘，但每張枱都鋪咗紅白格仔枱布，儀式感滿滿。十幾種口味之中，強烈建議榴槤友試呢個：榴槤忘返梳乎厘，採用馬來西亞D24榴槤，雖然入口食唔到榴槤肉，但榴槤味道完美地滲透喺成個梳乎厘入面，食完真係會令人榴槤忘返！其他口味都好精采，焦糖咖啡梳乎厘食到有咖啡嘅微苦，加埋焦糖嘅香甜都唔錯㗎～

你哋又鍾意食邊間嘅梳乎厘？歡迎留言話我聽^^
記得今晚9點準時上YouTube睇片喇～

Four O Five Coffee & Eatery
地址：觀塘成業街19-21號成業工業大廈地下2號鋪
黑色幽默梳乎厘 $138

JOY LITM
地址：銅鑼灣霎東街33號智選假日酒店地下G01號鋪
紅絲絨梳乎厘班戟 $108

TERA
地址：佐敦廟街273-285號寶發大廈地下4號鋪
金箔Nutella梳乎厘 $158（每日限定）

南山梳乎厘
地址：深水埗元州街1F號地鋪
榴槤忘返梳乎厘 $65
焦糖咖啡梳乎厘 $45

主持、撰文：Yvonne Lam
攝影、剪接：Doris Wong
美術：Anita Lam

TalkFood 先填飽肚子再前進
YouTube : https://www.youtube.com/user/TALKFOOD
Facebook : https://www.facebook.com/talkfood
Instagram : https://instagram.com/talkfood?igshid=MTA0ZTI1NzA=