【18區搵食-深水埗西多士合集】食完先發現4間餐廳3間都有多士｜每日限量手工芋泥西多士｜堅外脆內軟｜韓式無飯手卷｜米飯變蛋絲｜親民版法國餐廳高級多士｜手掌大炸雞髀｜圓形西多士

深水埗除咗係cafe聖地，都仲有其他選擇㗎！今次帶大家食嘅呢幾間，有齊小食、甜品同主食，包你食到捧住個肚走！

第一間Will’s Coffee，最出名係佢哋嘅手工芋泥西多士。小店係2人經營，人手有限，芋泥西多士每日限量20份，想食就要早少少起身啦！用本地芋頭製造，佢哋嘅芋泥除咗有加牛油同糖，仲好特別會加鹽落去提味；呢度嘅多士係煎嘅，食落冇咁多油，仲特登將糖份減少，怕甜嘅朋友都可一試。新鮮熱辣食嘅第一啖，真係外脆內軟，入面嘅芋泥滑身又綿密，正到暈呀！

Ppalli Ppalli係一間韓式餐廳，韓文「快啲快啲」嘅意思，讀快啲仲會變8282，咁啱＋82係韓國區號，語帶相關，有意思。無飯手卷將蛋絲代替白飯，擺入口仲會爆汁，好juicy！一定要試三色多士，用咗自製嘅白朱古力醬配時令水果，用煎爐慢慢烘至酥脆，內裏軟綿綿，好似法國餐廳食嘅高級甜品，食完人生無憾系列～

Poke Go主打Hawaii bowl，可以隨意配搭，如果有選擇困難症，餐廳都有啲配搭好嘅bowl。今次揀咗OHANA，可揀飯/沙律做底，揀沙律就冇咁heavy。所有配料切成一口size，食落好方便～三文魚新鮮肥美，加上開胃醬汁，食菜都可以食得好開心！

最後一間漢發麵家，下午時段到埗估唔到仲要排隊等位！喺附近嘅cafe冇人排，唯獨佢呢間人潮湧湧，不愧為老字號！厚切豬膶係重點，另外炸雞髀都非同小可，同手掌一樣大，雞皮脆卜卜，作為下午茶係邪惡絕配。呢度仲有圓形西多士，連埋中間嘅花生醬，今次真係飽晒了！

Will’s Coffee
地址：深水埗大埔道75號威信大廈地下2號鋪
手工芋泥西多士 $42

Ppalli Ppalli
地址：深水埗大南街230號地下
韓式無飯手卷$78
法國奶油麵包三色多士$58

Poke Go
地址：深水埗大南街211號地下
OHANA $98

漢發麵家
地址：深水埗大南街192號
豬膶米粉 $46
炸雞髀 $40
法蘭西多士 $40